E diela e 7 poezive dhe 7 poeteve:Teuta BIÇAKU

Jam hënë

———————————

Kur “u gatua” Universi i paanë,

mes shpërthimesh ku rrëzëllitën miliona diej,

u shfaqën meteorë, asteroidë, pluhur, kometa,

satelitë e planetë të vegjël e të mëdhenj.

Një vend i vogël m’u dha në hapësirë,

një trajektore e përcaktuar rreth planetit “mëmë”,

e vogël, e brishtë, plot kratere dhimbjesh,

nuk e lashë veten në hije, mora emrin Hënë.

Në netët e errëta, të zymta plot hije,

aty ku drita nuk feks, nuk depërton,

dritë marr nga diejt e vesh në fytyrë

mes errësirës dritën e tyre pasqyroj.

Si drapër, gjysmërreth, a fytyrëplotë,

aq dritë sa marr e ndaj në qiell.

Të marrë dritë nga unë kush ka nevojë,

jam Hënë, se ndoshta s’mund të jem diell.

Teuta Biçaku maj 2022