E diela me poeten prizrenase; Mirvete Kabashi Leku

FEMRËS

 Zoti e bëri femrën si fllad pranvere

E bëri lule që pragun zbukuron

Lum ai që  vlerën ia din

Kur i flet, kur e prek dhe ledhaton.

Lum ai yll që femrës vlerën ia di

Kur i qëndron pranë në ecje, në jetë.

Gjithë botën ta kesh si pasuri

Me të nuk krahasohet asgjë

Bukuri e gushës, mjaltë e ëmbël

Në sy, në gjoks, në shtat e në hap

A s’duket sikur prek një ëndërr

Kur ia ledhaton flokët e artë

Zoti i madh i dha sy dritë agimi

E bëri flutur, dallandyshe në lëndinë

I dha feskinë e paharruar të një burimi.

Lum ai që vlerën ia di!