E diela me shkrimtarin;Ismail Syla
NJË PAMJE BIBLIKE E ATDHEUT
——————————————
Në ditën e parë ndahet Toka nga Qielli
Drita nga Errësira, Dita nga Nata.
Në ditën e dytë Pamja e Lirisë
Projekton konturat e Atdheut Ideal.
Në ditën e tretë nga vrimat e harlisura të kaosit
Dynden barbarët dhe përgjysmojnë Atdheun Faktik.
Në ditën e katërt, të pestë… të gjashtëmbëdhjetë
Eklipset abortojnë Diellin e Madh të Atdheut.
Pastaj vjen shtatëmbëdhjetë janari
Tri krisma shurdhojnë muzikën e Vagnerit.
E Atdheut i rrënqethet trupi
E qan Toka e qan Qielli me lot bore.
Atdheu nuk mund të shkulet nga gurët e rëndë
Vetëm toka e mardhur gjermane kris.
Një venë e lodhur e Atdheut
Mbledh gjakun nëpër botë.
_________
Shënim:
Botuar në librin “Tempulli i braktisur” Rilindja, Prishtinë, 1998, shkruar në 10 vjetorin e rënies së Jusuf Gërvallës, Kadri Zekës dhe Bardhosh Gërvallës.
