E diela poetike me penën e artë:Gëzim Ajgeraj
NDOTJE
——————————–
S`ka ditë pa mjegulla fjalësh
as pa helm e vrer kah vjellin njëri tjetrin
nuk ka ditë as pa plot gënjeshtra
të gjitha na i servojnë me pjatën e helmit
nëpër sofrat e kokave
e me gotën e verbërisë sonë
ia pimë shafranin e epokës
S`ka ditë që në tryezën e mëngjesit
në vend të pelinit të kafesë
pimë helmin e ndërskamcave
se kush me bajrakun e vet
po i tregon
përrallat më të bukura
për mizat e sokakut
S`ka ditë që s`ndotet ky ambient
me broçkulla e pa broçkulla
luftë bajraqesh në skenë
se kush bajrakun e vet
më i pari ta ngulë
atje maje kodre
Medet
sa shumë na e zë frymën
ky ambient!
