E diela poetike me poeten:Nasia XHemalaj

NUK ISHTE SHËN VALENTINI.

—————————————–

Kur më fishkëlleje poshtë dritares,

lëkura më vishej morrnica zjarri,

streha jonë, larg syrit e gojëve të liga,

lëndina pas shtëpisë, me xixëllonja,

e stromën e barit.

Të parat puthje si shkëndija zjarresh,

në lakuriqësinë musht të dashurisë,

kafshuam buzët e “mollën e ndalueme”,

ish’ ditë e zakontë, si të gjitha ditët, sigurisht.

___________________________________

KËSHTU ËSHTË DASHURIA.(Per Shën Valentin)

Një trëndafil këpute sot,

dhe në se gjëmbi të shpon,

kështu është dashuria, me gjëmbat e hidhur,

me pjalmin e ëmbël që shpirtin lumturon.

Trëndafil që petalet shpërndan si puthjet,

e puthjet si hoje mjalti në buzë,

kam mbjellë farën tënde në baçen e zemrës,

që mos të më vyshkesh në jetë kurrë.