E diela poetike me poetin;Faruk Tasholli

DILNI SHANI MËRGIMTARËT

(Poezi humoristiko-satirike)

Dilni shani mërgimtarët

Si e çoi Konica*) gishtin,

Kur tha vetë për shqiptarët:

-Mos me pasë ta ngjesin bishtin!

E me pasë krejt ta heqin

Ja ta lanë n’gjysë – bishtcubel,

Për inat e kalojnë dreqin

Kush ma i pari n’cak po del!

Dilni shani se iu shkoi jeta

Tuj punu në dhena tjera,

Pse kur kthehen n’shtëpi t’veta

N’udhë të Zotit iu bijnë kah dera!

Dilni shani n’orët ma t’vona

Jep alarm ndoj delirant,

Se po l‘shohen me aviona

N’tokë të vet me ba desant!!!

Dilni mbyllni qebaptoret,

Dro mos trashen? I zen sherri?!

A „bam“ rrugës s’kalojnë orët,

Iu plas goma, iu ndalet kerri!

Dilni shani qitne uthin

Mos e leni me iu nxi ashtit,

Shfrynu bre si dertët fruthin:

„S’po durohen k’ta të jashtit!“

Dilni shani mërgimtarët,

Mos ka mbet naj kush pa sha???

Keq ndër shekeuj vu’jnë shqiptarët

Pse kurrë shamja n’vend s’iu ra!!!

——————————————–

*) Parafrazim nga një ese i Faik Konicës