E diela poetike me poetin;Skender Berisha

KALAJA E DURIMIT

Shembet natën e dro se më zë

flaka e shpirtit endet rrënojës

në majë flakëron kaltër

fryma ime që fryn kahmot

dikush ngritet kot

kollitet për mortin e ndjellur

që fshehtas kërcënon

mundohem ta fus në grusht erën time

dhe këngën e moçme

që tremb frikën e shpërndarë me grushta

nëpër rrugicat e mia të ngushta

nata po më tremb

i frikem rrënimit

sa hoqa derisa bashkova skajet e shpirtit

djegur e përvëluar është moti

kaq i thellë vau i shpresës

pse po m’i ikni besës

mos më dilni atje para kthesës

po rrënohem po

rrehem përditë për ju

pyka në trurin që vlon

rri si i shtangur pranë lumit tim që ngrin

niegull i ka rënë shumë

po ngrin ore po ngrin

me mua bashkë po ngrin

mos ma ngacmoni vrerin se do të shpërthejë

e i vie era sheshit

zverdhet i vrerosur

tashti vie Gjelina ime

e ngrin ore ngrin

në bregun e djathtë të lumit tim

sa rritet ky trishtim

më ngrin arrëza e fytit

fryma më zihet

a do të ketë shpëtim

moj Gjelinë

moj Gjelinë

2 shkurt 2015,Prizren