E diela poetike me shkrimtarin:Milazim Krasniqi

ÇAST I MREKULLISË

——————————-

Në këtë çast, deri sa rri në dritare

duke pritur ezanin,

fryn një erë e lehtë dhe disi lotuese

e bien pika të imëta shiu

që ujisin gjithandej barin e gjethet e pemëve

të cilat sikur zgjohen nga kllapia

E ia marrin një valleje të lehtë.

Disa njerëz po nguten

që të mos lagen më shumë

ndërsa retë lart lëvizin të disponuara

që po e gjallërojnë me infuzion

tokën që lëngonte nga thatësia.

Një grumbull sorrash fluturojnë të shqetësuara

mbi kulmin e çerdhes në Ulpianë

dhe në çast dëgjohet ezani

duke ftuar në falje e në shpëtim

deri sa kemi kohë.

Dhe të gjitha këto ndodhin në një çast

po secila për vete

secila si pjesë e tjetrës

dhe të gjitha së bashku si pjesë e mrekullisë,

jo si huqe të motit,

po si shenja të mirësisë së Zotit.