E mërkura poetike me poeten;- Eva KACANJA

 In res media…

(Në mes të gjërave)

Në këtë grotesk distik,

Kur truri hapet

nga fluks i mendimit,

Dhe në kthjelltësi perfektë,

arrij të shquaj

shqiponjën,

që i sulet presë,

Por dhe gjarprin

që zvarritet folesë.

Kur gjymtyrët,

nuk emërtohen më,

“E Djathta

dhe Majta”,

Por “Humbja

dhe Fitorja”,

Kur ylbere narcisë,

Në dymbëdhjetë ngjyra larushe,

mashtrojnë vizionin tim,

Dhe imja retinë fikson pa mëshirë,

hyrjet dhe daljet

në kuzhinën e Faustit,

Dëshirë dhe Dritë,

Errësirë dhe Frikë,

Në uri të ethshme,

Lodhur prej stuhish,

Plotem në rini…

Për t’u thyer sërish,

Si një kupë e shenjtë,

Plasur prej magjish…

Në dilemë distike,

Qenësisht dhe mosqenësish,

Veten e gjej,

ulur këmbëkryq,

Si një Budë e vogël,

Derdhur jashtë serie,

Në kalavar pikëpyetjesh,

Gruaje dhe fëmije:

-Unë ku jam?!

Në Bardhë

a në Zi?!

E në arrij të

zbuloj

Vërtetë,

Ku jam Unë,

Atëherë padyshim,

Zbulova,

Ku je Ti!

/www.qendrapress.com/