E mërkura poetike me poeten;Neviana SHEHI

NË PANAIRIN E LIBRAVE

————————————-

Në panairin e librit të sivjetshëm

si çdo vit edhe librit tim i kanë dhënë

një shtëpizë të vogël

Mjeshtrit e kësaj shtëpize

nuk janë të huaj

të panjohur jo që jo

ata janë vetë personazhet e tij

që dolën pa u ndjerë nga pesha e fletëve

dhe ngjarjeve në kërkim të dritës dhe lexuesit

Edhe pse rreth tyre ka kaq shumë shtëpiza

më të bukura dhe më shumëngjyrëshe librash të tjerë

ka dhe pallate të rëndë me struktura dominuese

dhe qiellgërvishtës shkrimore

ata nuk ndihen të mërzitur apo të bezdisur

Nuk bezdisen as nga bërrylat

dhe shikimet përbuzës të të tjerëve

nga fjalët pas krahëve

dhe turma e hipokritëve me kollare

dhe papion

Përkundrazi çdo mëngjes dhe mbrëmje

ai hap dy kanate

dyert

dhe dritaret e tij

për të pritur njerëzit

lexuesit e tij

për t’iu treguar atyre arsyen

përse shkruhet një libër

Dhe kjo ishte e natyrshme

librat e mi më ngjajnë vetëm mua

edhe pse unë

nuk i linda librat

ata më lindën mua

Në panairin e sivjetshëm të librit

nëse shikoni portretin tim në ndonjë libër

mundohuni t’i flisni

dhe të merrni përgjigje…

/www.QendraPress.com/