E Mërkura poetike me poetin:Sabit RRUSTEMI
SHKUNDE ATË MAJË KODRE
( Në kujtim të dajës Rexhë )
———————————–
Shkunde atë tufë lisash mbi tënden kokë
e atë dhe që nuk t’lë me dalë n’verë
shkundi përnjëherë e dil
dil se edhe dielli po t’shkrihet n’sy
e mbi vetull ajo kumri e ai zog mali
po k’non sall për ty
Hajde Rexha i Dadës Loçkë te plepat mbi shpi
ta shohim Rrushen kah ecë Shtegut t’Kronit
Ata sy të thellë e të zinj si dy kokrra drite
tek ajo degë lisi i ka varë me t’pa
Mos prit më
loti i pashterrur i motrës – o
trande atë majë kodre që t’rri sipër
e dil
se dhe trarët e shtëpisë
e troku i dorisë
janë nxirë e mpirë prej pritjes
Sokakun e ka m’lu bari
udhës pas shpie therrat mal janë ba
tek ajo Qafë n’atë cep shpati
kanë ngelë pranverat verat e krejt tjerat
O Rexha i nënës – o
mbi oxhak plisi i dhembjes përditë pret
e… pritja sa herë e nxinë
agujt e syve tanë që hapen me dashurinë për ty
e zbardhojnë
Nëpër lotë zjarri unat e votrës
si me tela sharkie prushit të mbledhur
vallen e Deli Agushit luajnë
pa të cilën valle Ti s’mund t’i mbyllje sytë
Dhe ai lis n’atë kukë mali e ajo Lajthi
ku shkrujshe djega e ëndrra për atë Peh’rri
nga malli po digjen për ty si kjo ditë e sotit
kur e prekë atë fund të motit
Mos prit më
lutet dhe motra gurëzuar te votra
Shkunde
përnjëmend shkunde atë majë kodre
se ti je vetë Plisi e Lisi
ku dita përditë sillet rrotull
ndërrohet e nuk soset
Shkunde e dil si n’legjenda të moçme
e shihe atë Rrënjë të njomë gjaku palëve të tokës
qysh rinohet duke i thithë kohët
mbi frone zeusësh
Pastaj n’daç rri n’daç kthehu
n’daç fshihu prej syve tanë
deri në një kohë të re
/www.QendraPress.com/
