E shtuna poetike me poetin:Kadrush RADOGOSHI

EURIDIKA U SHNDËRRUA NË FJALË

 ———————————————————-

Ishte ajër dhe ujë në fillim

Rreze dielli, ndriçim hëne e vezullim yjesh

Ishte në fillim Euridika.

Pastaj e bënë fjalë dhe e dërguan në burgun e heshtjes

Atje e veshën me rroba të grisura kuptimesh

Të ndotura nga jargë rrëshqanorësh

Të tërhequr zvarrë nëpër paragrafë kushtetutash,

Historish, monografish, biografish…

E shkula me rrënjë nga ato kontekste idiotësie

Ia hoqa një nga një rrobat e vjetra dhe tërë zhele-zhele

E futa në ujin shërues që buronte

Nga rrënjët e Lisit të Shenjtë

Pastaj ia lava sytë me qumështin

E gjirit të Rozafës të lënë jashtë murit të kështjellës,

E gjirit të Nuses së Re të lënë jashtë themeleve të Urës së Shenjtë.

Fjalën e larë e të shëruar e putha në të gjitha pjesët e trupit

Pastaj e mbolla në arat e mendjes dhe shpirtit…

Ajo i lëshoi rrënjët thellë-thellë

Lis Jete u bë

E filloi të më bëjë hije mua Orfeut,

Pastaj hyri në këngë për të mos dalë kurrë.