Fryma poetike e së dielës me poeten:-Blerina BEHARI

ME PELQEN TE SHKRUAJ

—————————————-

Më pëlqen të shkruaj pafund

dhe jetën ta hedh në vargje.

Më pëlqen që jeta të lindë

pa dëshpërim, vuajtje e qarje.

Më pëlqen poezinë ta kem në buzë,

çdo njeri ta shndërroj në muzë;

më pëlqen çdo pasion në netë lumturie,

ta shndërroj në poemë dashurie.

Më pëlqen elektra e shpërbërë

në mijëra copëzash dëshirash:

e hedhur në shkronjëza pafund

në medalione të etura hapësirash.

Më pëlqen të pasqyroj agimin e ditës

në medalionin e hënës së praruar.

Le të ndriçojnë mendjet e njerëzve

të shkruar nga dor‘ e bekuar !

Më pëlqen të shkruaj për universin

me misterin e tij që na mbulon.

Më pëlqen imagjinata ime,

reales gjithmonë ia kalon.

Dhe mbase shumë nuk do t’më kuptojnë

por e tillë dua të mbetem gjithmonë:

në zemër të kem dashurinë

e gjithë njerëzve që më rrethojnë.)

/www.QendraPress.com/