Fryma poetike e së dielës me poetin:-Gëzim AJGERAJ

PËR FJALËN

————————————-

nga frymëzimi i shpirtit

u lindë fjala

e bëri krahë

nga rrjedha e damarëve

të mendimit

mori fuqinë e flatroi

me krahët e sajë

pushtoi hapësirat e vargut

e u bë frymëzim

për kohët

lum ajo që doli

nga gjaku e ashti i mendit,

flatron kohëve

më i miri i fjalës

u bë emblemë.

DUKE I NGUSHËLLUAR MOTET

—————————————————

Duke i ngushëlluar ditët me shpresat e bardha për të nesërmen

Moteve të arratisë ua shërojmë plagët e mungesave tona

Që ende na i mbajnë rob udhët e gjeografike të ikjes

Shëmtinë e udhëve të përmalltë e zbukurojmë me bukurinë e kthimeve

Tek ia freskojmë ballin mallit diku nën hijet e flladeve buzë Sharrit

A mund të portretohet me ngjyrat e mallit dhimbja e moteve

Kur udhët ende m’i torturojnë ditët e arratisë

E pushi i dhimbjeve digjet ende nën hirin largësive

Nëpër buzëqeshjen e vrarë përpiqemi ta fshejmë dhimbën

Më kot kur cipa e plagës tonë ka hedhë shtat

Virusi i saj na la pa asnjë ditë të lumtur

Nëpër sythet e filizave të rinj kanë filluar të glacojnë motet

Me vesën e harrimeve na e vrasin frytin e trungut tonë

Lisit të kombit një nga një ia shkëputin fletët

Asgjë estetike s’i ka mbetur më kësaj shëmtie pos vajtje – ardhje

Dhe ylberet e përmallta që shkojnë e vijnë pa ne

Po si s`na i morën kthimet tona asnjëherë

Ç`estetikë t’i japë kësaj dite të përmalltë këtu në Alpe?

/www.QendraPress.com/