Fryma poetike e së dielës me poetin; Namik SELMANI
Fryma poetike e së dielës me poetin; Namik SELMANI
Moj vetullbardha, buzë detit
——————————————–
Sarandës, djepit kulturor të Çamërisë
Moj princeshë nga qielli ulur
Me kurorë madhështie,
Të merr fjalën ta bën pluhur
Kur nxjerr hiret mes shkëmbinjve.
Moj princeshë në brigje Joni
Në agimet dritëlara.
Ja, këtu ka nisur zoti
Bukuritë që ka Saranda.
Bota e madhe pa kufinj
Me kështjella, gurë e male
Këtu dielli bën krushqinë,
Me ullinj e portokalle.
Vetullbardha buzë deti
Ç’dorë, moj, të ka ujdisur?
Me gjithë yjet që ka qielli
Ballin-o ta kanë stolisur.
Dhe kur dhëmbët i nxjerr dimri
Dhe tufanet vijnë te dera
Ti vjen pranë si trëndafili
Çelur- në tre pranvera.
Dëgjoj zënë e lashtësisë
Nëpër dallgë pi verë amfore
Moj shenjtorja që sjell dritë
Jepna frymën engjëllore.
Kur na merr syrin dogana
Gjoksdjersitur, supelodhur.
Ti na vjen si në përralla.
Na fshin ballin e rrudhosur.
Kur zgjatojnë udhë bote
Trastëngarkuar, halleshumë
Marrim fjongon kaltërore
Nga ky breg e nga ky muzg.
Kur na mbyt një natë kurbeti
Dhe dysheku bëhet ferrë.
Dhe një gur i marrë prej deti
Bëhet diell, luleshqerrë.
& & &
Çamëri, o bisk i ëndrrës
Motiv popullor
————————————-
Çamëri, o bisk i ëndrrës
Si pëllumb në sup të këngës.
Dritëlarë, pragjehapur.
Sypërlotur, duarzgjatur.
Diell-o që nuk humb rreze.
Dritë e re që zbardh mëngjese.
Si dhioli për ditë kthimi
Larg, o larg, në ditë mërgimi.
.
Na pjek fiq e portokalle.
Na ndal hapat nëpër varre.
Zë më zë zgjon Osman Takën
Në një gjoks po na ndal dallgën.
Kërkon djepe dhe jorganë
E heq barin prag më prag.
Dorë më dorë mbaj gurë vatre
Të ndez zjarrin në buhare.
Nëpër degë të blertë ulliri
Trëndafili kërren gjirin.
E kërkon çibukë ode
E kërkon shtëmbat në kroje.
Shkojnë kuajt në karvane
Tringëllijnë zilet në stane.
Skuqet shega e pavjelë
Po prek ftonjtë në sepetë.
Çamëri, dritare zemre
Sillna fjalë e amanete.
Zanë Joni që prek detet
Me oitë që buzës mbetet.
Çamëri, livadh i shpirtit
Fshehur- në sklep të sirit.
Si një prehër me bajame
Na zgjon e këngë e valle dasme.
Boston, 14 dhjetor 2019
/www.QendraPress.com/
