Fryma poetike e së dielës me poetin:-Rexhep F.MORINA

UDHËRRËFYESI PROFETIK

(Kushtuar Adem Demaçit)

———————————–

Terri i robërisë,ia verbonte sytë atdheut,

Koha kërkonte dritë,dhe fuqinë e Anteut.

Fati në vorbull sillej,të lindëte forcë të re,

Popullit ti jep krahë,të ndriçon sikur rrufe.

Vite të errtë ishin,kur drita hyjnore zbriti,

Shtigjet tona për lirinë,magjishëm i ndriti.

Drita e shenjt ish njeriu,idealist e vizionar,

I cili u bë simboli jetës,i atdheut misionar.

Qëndroi përballë furtunave,i rreptë e stoik,

Asnjë stuhi se përkuli,shpirtin e tij heroik.

Thellë i lëshoi rrënjët,si një rrap nën tokë,

E rrënjët në popull,ia lidhnin zemrën fortë.

Në rrugën e nisur,as vuajtjet se ndalen dot,

Me sakrificën e madhe,ndryshoi një epokë.

Kolosi ynë historik,i revolucionit çlirimtar,

Ai udhërrëfyesi profetik,ndrit përjetë fanar.

/QendraPress/