Fryma poetike e së dielës me poetin:-Sahit F. OSMANI

KUR NJIHNIM VETVETEN

———————————-

S’kemi qenë të verbër të shihnim me sytë e Homerit,

kohërat nëpër shekuj na shkelnin me këmbë,

trimëritë e lavdishme i kthenin në gojëdhëna,

na përvetësonin që të ushqeheshim me gabime

Nga Trungu Ilir , – liritë çelnin të nesërmen,

të njihnim vetveten aty ku jetojmë,

sa herë syri i natës shkreptinte me terrin,

mjegullonte trungun, t’ia priste degët,

e dheun t’ia hante rrënjëve.

Duhej kohë të kalonte, gjersa kthjelloheshim

ta dallonim armikun që kërcënonte ekzistencën tonë

dhe kur njihnim vetveten ta shihnim me sy,

zgjonim kohërat e të parëve që shkreptinin për liri.

/QendraPress