Fryma poetike e së mërkurës  me poeten ;- Ajne IBERHYSAJ

OFSHAMË…!

———————

Shpesh e dëgjoj , e ndjej një ofshamë

jo nga dhimbje që s’i ngjan plagës…,

mes ofshamës ajo vesh petkun e mërzisë

trupin e mbështjell me rreze dielli

dhe kalon nëpër bebëzat e syve

aty ku shpresa rri pezull

ashtu si hëna e fshehur pas reve !

Zemra rreh me tallaz e lumturia vritet

jo për t’u pajtuar me detin e çmendur…,

por për t’i dhënë të nesërmes një arsye

që ajo të jetë tjetër e disi më ndryshe !

Çdo plagë shpirti e ëmbëlson etjen ,

buzëqeshja është çelësi i një puthje…,

ku sytë treten tejpërtej

dhe velandojnë mëkatet

mes ofshamë fjalësh…!

Ajo që lind nga brenga , dhimbja

është e nesërmja që ecën zbathur…,

ajo ecën drithëruese mes hijesh

por kalon udhën e hidhur të sotme !

/QendraPress/