Fryma poetike e së mërkurës me poeten;-Blerina BEHARI

NUK MUND

—————————–

Nuk mund të ndal gurët që bien

si hijet e skëterrës;

Nuk mund të hesht kur toka gllabëron

mijëra jetë në rrëshqitje kohërash;

Nuk mund të shikoj stuhinë

që ka ngjyra demoni të ferrit;

Nuk mund ti qesh humnerës

që më pret si Caribdi,Odiseun;

Nuk mund të dua egërsinë e dashurisë

me sindrom Stocholmi.

Nuk mund të ushqehem në pjatën e Ciklopit

e të mendoj fijen e tjerrë në kohë moderne;

Nuk mund të jetoj me krahë korbash të lumtur;

Nuk mund të tret lotët

me pika shiu vjeshte që ndal në Mars.

Nuk mund të qesh me marshe funebre

mbi arkmorte poezish të vrara nga indiferenca;

Nuk mund të shtirem si jeta e tjetrit.

Nuk mund të zhytem në depozita harrese

edhe kur këndoj psallme faljeje në kishë!

/www.qendrapress.com/