Fryma poetike e së mërkurës me poetin:- Gëzim AJGERAJ

COPËZA TË NJË LETRE NGA ATDHEU

———————————————–

Ke ikur atje ku njëmijë vjet liria ka emër

të strehosh ëndërrat dhe kokën në rrezik

nga motet e tërbuara ballkanike

Ti ke veç pranvera i dashur vëlla, ke veç shkëlqim

pas shkëndijave të tua ndizen kandilat e lirisë

të munguar shekujve këtu tek ne

Sado që euforia e kohës do na mashtrojë

herë herë del edhe ndonjë palaço

e hedh gurë pas zogjve tuaj atje

por ti mbetesh emri i idealit të dritës për ne

Tek ne historia ka nisur të shkruhet së prapthi

bile kolaboratorët me një rrëfim nëpër media të shitura

lustracion i bien biografisë së vet të zezë brenda orës

dhe vet – shpallen heronj të gjallë njëherësh

E ata shokët e idealit tënd vëlla

kanë ikur moti në botën e përtejme

për lirinë dhe s’u kthyen më,

as ti nuk e gëzove ditën e dasmës së madhe

Bile vëlla i dashur, atij idealit tënd

po thonë se i është ndalur ora

sa turp më vie kur ta nis edhe këtë fjalë

sa i skuqur ndjehem para sakrificës tënde

Më mirë vëlla të mos na shohësh ne

me këto paçavure grindjesh e etje të pazareve

për një lëkurë karrigeje

që as’sesi ta ngopin të mallkuarën

Nuk dua aspak të të zhgënjej e as të të fyej

Këtu shumëç’ka është nëpërkëmbur

Lufta liria paqja, njeriu, njerëzorja, shëmbëlltyra

Nëpër mote të liga po ecim, dhe fati i atdheut

E di se nuk thyhesh, sepse nuk je thyer në asnjë etapë

dhe as do thyhesh për asnjë fortunë

dhe kurrë mos u thyej

se një ditë e drejta jonë, patjetër do triumfojë

/QendraPress/