Fundjava poetike me poetin: Besnik Krasniqi

Atdheu im

Atdheu im si im atë

rri i kërrusur në mendime

kujton luftëtarët

që këtyre trojeve

linin eshtrat

për një lis në mal

për një kullotë në bjeshkë

për një bimë në fushë

për një shtëpi buzë lumit

për një sofër të shtruar “mikut”

për një besë  dhënë armikut.

Të copëruan e gjymtuan atdheu im

nga të gjitha anët të sulmuan

ti qëndroje e luftoje

herë me armiq

herë me vetveten.

Armiqtë i kishe të shumtë

miqtë të paktë

kjo të kushtoi shumë

sepse derdhe gjakun lumë

për lirinë që gjakove

e kurrë të plotë s’e fitove.

Atdheu im si im atë

i urtë për mikun

i rreptë për armikun.