Gjykata Speciale arreston në Belgjikë një komandant të UÇK-së

Pjetër Shala, ish-komandat i UÇK-së, është ndaluar në Belgjikë me urdhër të lëshuar nga Dhomat e Specializuara të Kosovës. Komandant Ujku siç njihej në kohë lufte Shala ishte intervistuar më parë nga Gjykata Speciale.Shala ishte intervistuar në Bruksel në cilësinë e të dyshuarit nga hetuesit e Prokurorisë Speciale të Dhomave të Specializuara të Kosovës.Shala ka thënë se ka qenë i angazhuar në zonën e Dukagjinit si komandant në fshatin Dujakë.

Njoftimi i plotë:

PJETËR SHALA ARRESTOHET NË BELGJIKË NË ZBATIM TË FLETARRESTIMIT TË LËSHUAR NGA DHOMAT E SPECIALIZUARA TË KOSOVËS

Më 16 mars 2021, autoritetet e Belgjikës arrestuan Pjetër Shalën në zbatim të fletarrestimit dhe aktakuzës së konfirmuar për krime lufte, lëshuar nga Gjykatësi i Procedurës Paraprake i Dhomave të Specializuara të Kosovës. Pjetër Shala do të mbahet i ndaluar në Belgjikë, në pritje të transferimit të tij në objektin e paraburgimit të DHSK-së në Hagë.Së shpejti do të jepet më shumë informacion ku do të përfshihet edhe informacion për nxjerrjen publike të aktakuzës së konfirmuar me redaktimet e nevojshme. Në bazë të rregullës 88 të Rregullores së Procedurës dhe Provave, aktakuza bëhet publike jo më vonë se paraqitja e parë e të akuzuarit