INSPEKTORATI JEP DETAJE PËR ARRESTIMIN E 8 ZYRTARËVE POLICORË
Inspektorati Policor i Kosovës ka dhënë detaje për arrestimin e tetë zyrtarëce policorë gjatë mëngjesit të së premtës njofton,
Me anë të një komunikate për media, IPK njofton se hetimi për këtë rast ka filluar kohë më parë pas pranimit të një ankese dhe informacioneve përmes rrugëve operative me dyshimin fillestar se një zyrtar policor ishte i përfshirë në aktivitete të kundërligjshme.
Hetimi është zgjeruar duke përfshirë si të dyshuar edhe disa zyrtarë tjerë policorë dhe ka përfshirë edhe masat e fshehta të hetimit në koordinim me Prokurorinë Themelore të Prishtinës me urdhëresë të Gjyqtarit të Procedurës Paraprake dhe me përkrahjen edhe nga Policia e Kosovës.
“Si rezultat i hetimit sot në orët e hershme të mëngjesit në Prishtinë është realizuar operacioni i koduar me emrin ‘Jugu’ me ç’rast janë arrestuar tetë zyrtarë policorë me dyshimin për veprat penale ‘keqtrajtim gjatë ushtrimit të detyrës zyrtare’, ‘cenimi i së drejtës për ushtrimin e mjetit juridik”, keqpërdorim i pozitës apo autoritetit zyrtar’, ‘ushtrim ndikimi’ dhe ‘falsifikim i dokumentit zyrtar’”, thuhet në njoftim.
Sipas komunikatës së IPK’së, me urdhër të Gjykatës Themelore në Prishtinë hetuesit e IPK-së kanë realizuar kontroll në tri lokacione në Prishtinë ku në cilësi të provave janë konfiskuar gjësende të ndryshme.
“Hetuesit e IPK-së pritet të ndërmarrin edhe veprime të tjera hetimore lidhur me këtë rast në konsultim të vazhdueshëm me prokurorin përgjegjës në përputhje me autorizimet ligjore të IPK-së dhe Kodit të Procedurës Penale”, thuhet në komunikatë
