Kryeministri Kurti publikon marrëveshjen që ia propozoi Vuçiqit në Bruksel: Serbia ka ardhur në mesin e popullsisë shqiptare me gjenocid dhe ka ikur me gjenocid

                                  Kryetaministri Albin Kurti, tha se në takimin e dytë me delegacionin e Serbisë në Bruksel, sot ofruan një Deklaratë të Paqes me gjashtë nene, të balancuar dhe në gjuhën angleze, e cila flet për zotimin për mossulmim të njëri-tjetrit dhe për reciprocitet të të drejtave. Ai në një postim në Facebook tregoi se po ashtu ofruan edhe dëshmi të 11 shkeljeve që i bën Serbia ndaj Kosovës përmes barrierave kundër tregtisë së lirë e që do të duhej të eliminoheshin, gjersa shtoi se u refuzuan të dyja këto. “Për dallim nga ndërmjetësi Josep Borrell, kryetari i Serbisë nuk i mori tre librat që ia dhashë: rrëfime të grave të përdhunuara në Kosovë gjatë luftës, listën e 1.133 fëmijëve të vrarë prej të cilëve 109 janë ende të pagjetur, dhe librin “Dosja Britanike” për dëbimin e shqiptarëve nga Sanxhaku i Nishit”, shkroi Kurti. Tutje, shefi i Qeverisë tha se është për të ardhur keq që nuk arritën të dalim së paku me një deklaratë të përbashkët nga ky takim. “Shkaku ishte që delegacioni serb nuk pranoi futjen në tekst të togfjalëshit “ballafaqimi me të kaluarën””, shtoi Kurti. “Serbia si shtet ka ardhur në mesin e popullsisë shqiptare me gjenocid dhe ka ikur me gjenocid. Mosnjohja e së kaluarës së saj kriminale dhe mosnjohja e pavarësisë së Kosovës janë të lidhura ngusht.”“Ne vazhdojmë të jemi të përkushtuar për paqe dhe drejtësi, për siguri dhe stabilitet, për demokraci dhe progres. Do të jemi të gatshëm për takime e biseda konstruktive, dhe për dallim nga fqinji ynë verior nuk kemi dilema sa i përket integrimeve evropiane dhe euro-atlantike.”