Kuvendarja e AAK-së, Agnesa Sinanaj, i bashkohet LDK-së në Prizren
Anëtarja e Kuvendit Komunal të Prizrenit, Agnesa Sinanaj, i është bashkuar Lidhjes Demokratike të Kosovës (LDK) në një hap të ri për të forcuar angazhimin e saj në shërbim të qytetarëve dhe për të ndryshuar modelin qeverisës në Prizren.
Agnesa, e cila ka kontribuar në politikë si anëtare e subjektit AAK, tashmë do të jetë pjesë e familjes LDK, duke e theksuar përkushtimin e saj për bashkëpunim të ngushtë me qytetarët. Me dy mandate në Kuvendin e Prizrenit, ajo ka treguar angazhimin e saj për interesat e komunitetit.
E lindur dhe e rritur në Shkozë, Agnesa kreu shkollimin fillor në shkollën “Heronjtë e Lumës”, të mesëm në Gjimnazin “Gjon Buzuku” në Prizren dhe diplomoi në Fakultetin Ekonomik në Universitetin e Prishtinës. Ajo është e martuar me Dreni Gavazaj dhe ka një vajzë, Lizën.
“Jemi bashkë për punë të mira dhe do të vazhdojmë të jemi krah i qytetarëve,” theksoi Agnesa gjatë deklaratës së saj. Kjo bashkëngjitje është parë si një hap pozitiv për forcimin e LDK-së dhe përmirësimin e shërbimeve publike në Prizren.
