OSMANI, KUSARI-LILA E KADAJ-BUJUPI ME PROPOZIM PËR RIMËKËMBJEN EKONOMIKE

Kryeparlamentarja, Vjosa Osmani, bashkë me dy deputetet; Mimoza Kusari-Lila e Donika Kadaj-Bujupi, kanë propozuar mbështetje më të madhe për sektorin prodhues përmes mekanizmit të Pakos për Rimëkëmbje Ekonomike.

Osmani përmes një postimi në Facebook tha se “Sektori i prodhimit dhe i shërbimeve vendore është goditur rëndë nga kriza e shkaktuar nga pandemia COVID-19, ku shumë kompani janë duke funksionuar me kapacitete të limituara dhe me numër të limituar të punëtorëve. Andaj, zhvillimi i politikave që kanë për synim mbrojtjen e vendeve të punës në sektorin e prodhimit vendor dhe të shërbimeve vendore është e domosdoshme”.

Po ashtu ajo theksoi se “Legjislacioni aktual përveç që nuk parasheh preferenca për kompanitë prodhuese dhe shërbyese vendore, ato në fakt diskriminohen në fillim të procesit të tenderimit. Shpeshherë, specifikimet janë hartuar në atë mënyrë që ua bëjnë të pamundur kompanive lokale prodhuese dhe shërbyese të konkurrojnë në procese tenderuese”.

Ajo tregoi për vështirësitë e konkurrencës që kanë kompanitë lokale prodhuese e shërbese

“Prandaj, në këtë periudhë, në shpenzimet qeveritare qofshin ato blerje publike apo investime kapitale duhet t’i jepet përparësi kompanive prodhuese si të produkteve apo edhe të shërbimeve. Aktualisht, kompanitë lokale prodhuese dhe shërbyese e kanë shumë të vështirë të konkurrojnë andaj duhet të kemi masa preferenciale. Ne nuk do të jemi vendi i parë që do të ndërmerrnim masa të tilla, sepse ato tashmë janë bërë nga një numër shtetesh, përfshi shtete të rajonit që gjithashtu kanë nënshkruar MSA dhe synojnë integrimin evropian”, vazhdoi Osmani.

“Për këtë qëllim, së bashku me deputetet Mimoza Kusari-Lila dhe Donika Kadaj-Bujupi, propozuam amandament në Ligjin për Rimëkëmbje Ekonomike, nëpërmjet të cilit arrihet po ky qëllim dhe ndihmohen prodhuesit vendor dhe ofruesit e shërbimeve vendore në këtë periudhë të vështirë të pandemisë. Pra, nëpërmjet këtij amendamenti parashihen përparësitë për prodhuesit e produkteve dhe shërbimeve vendore përmes një neni të veçantë. Shpresoj që ky propozim do ta marrë përkrahjen e deputetëve të të gjitha partive, sepse nëse ne nuk zgjedhim t’u qëndrojmë në krah të prodhuesve tanë vendor, atëherë kush?”, përfundon propozimi.