Sveçla: Nuk jemi të interesuar për luftë, propagandë e dyshes Serbi-Rusi
Ministri i Punëve të Brendshme, Xhelal Sveçla ka reaguar ndaj pretendimeve të zyrtarëve serbë se Republika e Kosovës ka ngritur në gjendje gatishmërie FSK-në. Sveçla këto deklarime i ka quajtur të pavërteta dhe propagandë të Serbisë e Rusisë, shkruan Gazeta Online Reporteri.net.Në një postim në Facebook, Sveçla thotë se është pikërisht Rusia dhe Serbia ajo që ka ngritur gjendje gatishmërie ushtarake, e që po urdhëron ngritjen e barrikadave të reja.“Republika e Kosovës nuk ka qasje agresore e me aspirata pushtuese si Serbia. Republika e Kosovës ka synim paqen e stabilitetin ndërsa Serbia e ka destabilizimin dhe luftën. Deklarimet se Republika e Kosovës ka ngritur gjendje gatishmërie janë tërësisht të pavërteta dhe janë pjesë e propagandës së dyshes Serbi- Rusi. Është pikërisht Serbia e ndikuar nga Rusia ajo që ka ngritur gjendje gatishmërie ushtarake, po urdhëron ngritjen e barrikadave të reja, për të arsyetuar dhe mbrojtur grupet kriminale që terrorizojnë në veçanti qytetarët e etnisë serbe që jetojnë në Kosovë”, ka shkruar Sveçla.Ministri i Punëve të Brendshme thotë se duan të luftojnë krimin dhe terrorizmin brenda territorit të Kosovës, e një gjë e tillë po i pengon Serbisë.Ai thotë se Policia e Kosovës po zbaton mandatin e saj ligjor, si edhe FSK po kryen detyrat e saj të përditshme.“Nuk jemi të interesuar për luftë por angazhohemi për luftim të krimit dhe terrorizmit brenda shtetit tonë. Kjo i pengon Serbisë sepse ndër vite ka mirëmbajtur në të gjitha format grupet kriminale në veri të vendit. Policia e Kosovës është duke zbatuar si kudo në Republikën e Kosovës mandatin e saj ligjor. Ka detyra të përditshme të tyre e jo gatishmëri për luftë. Kjo vlenë edhe për Forcën e Sigurisë së Kosovës e cila kryen detyrat e saj të përditshme dhe as që bëhet fjalë për ngritje të gatishmërisë apo angazhim të rezervistëve”, shkroi mes tjerash ai.Kosova është në koordinim të ngushtë me partnerët ndërkombëtarë që çështja të zgjidhet pa eskalim, thotë Sveçla.“Institucionet e Republikës së Kosovës janë në koordinim të ngushtë me partnerët ndërkombëtar që kjo çështje të zgjidhet pa asnjë eskalim të mundshëm. Ky fakt dukshëm po i pengon Serbisë e cila po angazhohet maksimalisht që barrikadat të prodhojnë qoftë edhe viktima në njerëz dhe kjo dëshmohet nga sulmet e njëpasnjëshme të armatosura ndaj zyrtarëve policor, pjesëtarëve të EULEX e së fundmi edhe ndaj KFOR-it”, shkroi Ministri i Punëve të Brendshme.Sveçla thotë se Serbia me në krye Vuçiqin po tenton të cënojë vlerat demokratike që Kosova ka promovuar, ndërsa ka theksuar se shteti ynë nuk do të ndalet në mbrojtjen e vlerave demokratike, pavarësisht tendencave kërcënuese.“Me barrikadat si mjet, Serbia po lufton sovranitetin dhe integritetin territorial të shtetit fqinj, Kosovës, ndërkaq ne jemi të interesuar të luftojmë krimin dhe bandat kriminale, brenda shtetit tonë, të kujtdo qofshin ato. Kurdo që lufta kundër krimit po shpërfaq që ushtrimi legjitim i kompetencave në vendin tonë është në dobi të secilit qytetar pavarësisht etnisë, Serbia me në krye Vuçiçin, po tenton me çdo kusht të cenojë vlerat demokratike që shteti ynë ka promovuar dhe do të vazhdojë të mbrojë. Andaj, ne nuk do të ndalemi drejt mbrojtjes së këtyre vlerave demokratike dhe të qenurit pranë të gjithë qytetarëve tanë pa dallim, pavarësisht tendencave kërcënuese”, shkroi Sveçla në Facebook./
