E mërkura poetike me poeten- Teuta BIÇAKU

Ditë shiu

————————–

E ç’ta bëj këtë ditë të zymtë vjeshte?

E di që do derdhet me kotësi si vetë shiu.

Ta mbledh, ta shtrydh në gotë e të dehem s’do t’ mund,

se mendja velat e motorët i drejton gjetiu.

E ç’ti bëj vargjet që kuturu nisen,

të brishtë, të hollë, të ndjeshëm që era i merr?

I qull, u prish formën, ngjyrën ky shi plogështie

e syri s’i shquan, se retë bëjnë terr.

Ik, o sy, fli në ëndrrën e patrazuar.

Mos hap porta, kanate, se dritë sot nuk do të hyjë.

Stuku nën mbulesë me nënkresë shtrënguar.

Prit të nesërmen, me shpresë se dielli do të vijë.

/www.qendrapress.com/