Çaste poetike me poeten;Trandafile MALSHI

JAM MIRË

————————-

Jam mirë!

Mos më shihni ashtu, ndryshe.

Ma afroni një sup

të qaj veç njëherë,

S’dua mëshirë!

Bëjeni, se do t’ju përmbushë në zemër

Një gjest i mirë.

Jeta, motiv i shtrenjtë dhe për mua.

Dua ta jetoj.

S’më doli koha

T’i arrij gjithë andrrat.

Mos më mëshironi!

S’ka gjë!

Jetën prapë unë e dua.

E dua ashtu

Me lule e rreze dielli

Të rrjedhë e pastër si krua.

Nëse s’i arrita rrezet

Ma falni një rreze nga jeta juaj

Më shumë do tju dua.

Jam mirë.

Ende s’më është fikur shpresa,

Prapë e kam në sy rrezen e diellit,

Prapë e kam në zemër dritën e paqtë të jetës,

Prapë e kam në shpirt,

Dashurinë për ju.

Paçka se kur ju thirra

S’më dëgjuat….

Unë ju kërkova kaq pak…

Le të bie nata e thellë dhe e gjatë

Për mua veç dritë përcjell,

Sepse edhe në errësirë,

Unë veç ndriçoj, dritë unë jam!

Unë jam mirë!

/www.QendraPress.com/