Kurti: Masakra e Studimes, strategji gjenocidale e Serbisë

               Janë bërë 26 vjet nga koha kur në Studime të Vushtrrisë, forcat serbe vranë mbi 100 civilë të pafajshëm. Me rastin e 26-vjetorit të masakrës, nën patronazhin e kryetarit të Komunës së Vushtrrisë, Ferit Idrizi, u mbajt Akademi Përkujtimore, ku mori pjesë edhe kryeministri në dorëheqje, Albin Kurti. i cili theksoi se vetëm me drejtësi do të arrihet paqja për vuajtjen e popullit. “Në prill të atij viti, qytetarët e Studimes u dëbuan nga shtëpitë e tyre dhe kërkoheshin vende më të sigurta, duke kërkuar strehë. Strategjia gjenocidale e Serbisë ishte plan i errët i tyre dhe një nga ato ishte edhe ajo në Vushtrri. Në mbrëmje të 2 majit filloi terrori ndaj popullit në kolonë. Brenda dy orësh u vranë mbi 116 civilë të pafajshëm. Të gjithë ju që keni mbijetuar jeni dëshmi e gjallë e forcës së popullit tonë. Krimet kundër njerizimit nuk harrohen dhe vetëm me drejtësi e dënime për kriminelët do të bëhet paqja e qëndrueshme”, ka thënë Kurti. Kryetari i Vushtrrisë, Ferit Idrizi, tha se në ditë dhimbjeje është më e nevojshme se kurrë më parë uniteti politik. “Masakra e 2 majit ka lënë gjurmë të pashlyeshme dhe askush deri më tani nuk është ndëshkuar. Kemi obligim të ndërtojmë institucione dhe të krijojmë unitet, sepse vetëm uniteti e ka shpëtuar këtë popull. Në këtë ditë të mos harrojmë se burrat që drejtuan luftën që sot po mbahen padrejtësisht në Hagë, ndaj është e nevojshme uniteti institucional”, tha ai./rtk