Çaste poetike me poeten;-Drita Rubjeka ZENELI

Shalli

—————————

E hodha supeve gjysmëshallin e mëndafshtë,

Në këtë mbrëmje të freskët verore,

Mosha më thirri të rrëmoj në sirtarin e shajeve,

Sytë më mbetën tek mëndafshi ngjyrëmollë.

Në këtë mbrëmje e hodha supeve si stoli,

Rrudhat në ngjyrëmollë të më pudrosë lehtë,

Supet të më përkëdhelë kur fryn puhizë,

Kështu kujtimet më mbajnë ngrohtë.

Ti ndoshta e ke harruar gjysmëshallin tënd,

E kujtimet nuk të ndjekin si gjysmëhija jote,

Të mirat mendime i kthen në gërmadhë,

Dhe brenda gërmadhës i fsheh radhë, radhë.

E prapë gjysmëshalli im ka mbetur ngjyrëmollë,

Po gjysmëshalli yt ka ende xixa?

A xixat të mbetën në duar,

Përdredhur vesit djallëzor.

Nuk më bindet supeve gjysmëshalli sonte,

Rrëshqet e lazdrohet në puhizë kujtimesh,

E prek a më prek e më kthen në mote,

Në këtë mbrëmje të freskët yjesh.

/QendraPress/