Çaste poetike me poeten;-Nita BARDHI

Trupi i natës

———————

Sytë e bufit

e shikuan trupin e natës

nga koka te këmbët.

Gërshetëzës ëndrra-thurrur

i falën pak jetë

nga liqeni ku shihte veten hëna-

premtim përfytyrimi,

nga hëna me yje të mesnatës përreth-

premtim heshtjeje,

nga yjet e mesnatës që

këndojnë hymnin kozmik para agimit-

premtim hyjnor,

nga agimi ku retë ikin në

 fërfëllim të erës së kohës-

premtim rimishërimi

nga retë që boshatisin udhët e dritës-

premtim i udhëtimit që s’mbaron

nga drita, frymëmarrje e kohës-

premtim i përjetësisë që atëherë e sot.

Vetëm të nesërmen,

të nesërmen nuk ia premtuan dot.

/QendraPress/