Çaste poetike me poeten;-Rudina Muharremi BEJA

DIALOG

—————–

A e dini ç’peshë ka një dialog?

Është pasqyra më e bukur e mendimit,

aty ku secili lë të vërtetën e vet

pa frikë nga dyshimi.

Nga një bisedë e tillë askush s’del i humbur;

aty etja për të vërtetën merr frymë,

rrugët hapen drejt qetësisë së kërkuar,

jo drejt heshtjes së rëndë

plot hidhërim.

Ka njerëz që grindjen e kanë zakon,

ndaj, jo çdo dialog lulëzon.

Këndi i vështrimit të tyre nuk lëviz,

urat e paqes prishin me dorë të ftohtë.

Mirsjellja juaj mund t’u duket dobësi,

empatia juaj mund t’u ngjajë marrëzi.

Por mungesa e tyre është katastrofë e vërtetë,

zi është mbi çdo zemër, vetëm zi.

/QendraPress/