Çaste poetike me poetin:-Mehdi KRASNIQI

TI JE E PAVDKESHMJA IME

(Letër nënës sime)

—————————–

Të kam shkruar dhjetra letra

ndonëse jo të gjithat i ke lexuar

Të kam shkruar

për rëniet e fitoret e mia

Për dhimbjet e mia të përnatshme

kollën e thatë

që s’linte të flinte askë në shtëpi, as ty

Ti e para zgjoheshe nga gjumi…

Të kam shkruar për netët tua pa gjumë

për djepin që e përkundje me njërën dorë

teksa me tjetrën ndizje zjarrin herët në mëngjes para se të dilte dielli mbi kurrizin e bjeshkës

Për bukën, sofrën e gëzuar

për enët që i laje nën strehë të shtëpisë kohë e pa kohë, nanë!

Të kam shkruar për vjershat e mia

romanet, ditarin e jetës

arkivin e kujtimeve të fëmijërisë, të hijekive tua…

Të kam shkruar për udhëtimet e mia poshtë e përpjetë globit

për dekoratat e nderimet e larta

Ta kam parë gëzimin në sy, nanë!

Të kam shkruar për dashurinë time

gruan, fëmijët e mi

për rritën e tyre në duart tua të arta, nanë!

Megjithatë

dridhem nga frika që më është futur në palcë

nëse nuk kam arritur “me të dashtë” sa duhet, nanë…

E di

s’ka një kohë tjetër që i sillet përreth tjetrës kohë

e unë, “me të dashtë” veç edhe pak më shumë, nanë!

/QendraPress/