Çaste poetike me  poetin:-Sami MULAJ

LIBRI IM I JETËS

—————————–

Mëngjese diellore

e netë dritë e hije hënore,

germa si në fjalën e shkruar

rrinë në parathënjen e tij.

I pa shkruar,

faqet janë të bardha,

disa të pastra borë,

pena e bojës e derdhur

ka njollosur ndonjë.

Diku ndonjë fjalë

si me kurriz breshke

e shkruar gabim,

ndonjë tjetër

si gjurmë endacaku kembëzbathur,

me gomë fshirë.

Një tjetër faqe,

ah, jo vetëm një,

edhe me shumë të lagura,

lotët aty rigë.

Disa me cepat e thyera,

palosjet ku janë ruajtur shënime

viza kanë lenë…

disa fletë të grisura,

si gjethe vjeshte të verdha kanë renë,

kanë mbetur edhe disa faqe,

krejt pak kanë ngelë…

Libri im i jetës,

një autoportret humbur rrugës,

jo ai vezullues i nisjes,

tani gati të hidhet në zjarr

për tu djegë…

Hiri,

kujtimi i tij i vetëm,

pasthënje

e nata duke renë…

/QendraPress/