A kufizohet me ligj të qënit dy herë ministër brenda një mandati?
Arben Vitia sot për të tretën herë u emërua Ministër i Shëndetësisë, e dy prej tyre vetëm brenda një mandati. Vitia i cili dha dorëheqje në tetor të vitit 2021 nga pozita e ministrit të Shëndetësisë, për të marrë pjesë në zgjedhjet komunale për Kryetar të Prishtinës nga radhët e VV-së.Njohësi i çështjeve juridike, Ehat Miftaraj në një prononcim për Gazetën Online Reporteri.net ka thënë se nuk ka ndonjë dispozitë ligjore që kufizon të drejtën e Arben Vitisë të caktohet në pozitën e Ministrit të Shëndetësisë.Por, marrjen e pozitave në sektorin privat që ndërlidhen me shëndetësinë po e sheh si kontestuese Miftaraj. “Në bazë të ligjit për Parandalimin e Konfliktit të Interesit në ushtrimin e Funksionit Publik, nuk ka ndonjë dispozitë ligjore që kufizon të drejtën e Arben Vitisë të caktohet në pozitën e Ministrit të Shëndetësisë. Sidoqoftë, kontestuese ka qenë marrja e pozitave nga ana e Arben Vitisë, në sektorin privat që ndërlidhen me shëndetësinë pas përfundimit të mandatit të tij si Ministër i Shëndetësisë. Sidoqoftë, lidhur me dyshimet apo përceptimet lidhur këtë situatë është Agjencia për Parandalimin e Korrupsionit autoritet kompetent për të informuar publikun nëse është filluar ndonjëherë ndonjë procedurë nga ana e tyre sipas detyrës zyrtare apo në bazë të ndonjë inicimi të jashtëm për situatën potenciale të konfliktit të interesit”, tha Miftaraj.Tutje ai shtoi se Vitia tani me marrjen e detyrës ka detyrë të parandalojë e të zgjidhë çdo situatë ndërmjet interesave të tij publike si Ministër dhe atyre private me pozitat që ka mbajtur deri tani në institucione private të shëndetësisë. “Në këtë fazë çka është me interes është fakti se Arben Vitia me marrjen e detyrës dhe gjatë ushtrimit të saj, ka për detyrë të parandalojë dhe të zgjidhë vetë në mënyrën më efektive të mundshme, çdo situatë të konfliktit ndërmjet interesave të tij publike si Ministër i Shëndetësisë dhe interesave të tij private me pozitat që ka mbajtur deri tani në institucionet private të shëndetësisë”, tha Njohësi i çështjeve juridike./Reporteri.net/
