Çaste poetike me poeten;-Inida BRAHIMI

Desha të dija si je …

——————————–

Inati im ,

Buzagazi im,

Fytyrë e shpirtit …

Dritë dhe hije e kockës sime

Dije;

Në liqenin e gjakut asgjë s’ka ndryshuar

Barka e zemrës lëshuar

Veç shija e metaltë e trishtit tënd

përthyhet mbi mua

Shkëlqen mallimi në vena me sytë e tu

Plumb e plagë

Dhe krahët jehojnë në përqafim përvëlues

Vorbull triumfi në kërkimfalje

Trazim dhe qartësi

Llavë dhe akull

Asgjë s’ka ndryshuar në liqenin tim të gjakut

E vetmja gjë e prekshme është kjo e dielë

Që varet si kryqi që në ëndërr më dhe

Desha të dija si je …

/QendraPress/