Çaste poetike me poeten;-Sadete HISENI

Qytetit t’hekurudhës

—————————-

U çel dita n’qytetin e hekurudhës

U ba çicër nën hijet e ndërtesave

Të bane gardh

Thurrë kryq e tërthuer

Palue qiellës si mullinjtë e erës

Kurse

Hiç ma larg se mbramë,

Ia ndjeva zapullinë tu këndue tallava

N’shtratin e asfaltit

Qyteti si zgjua bletësh,

Me jetë nate, me jerm dritash,

Me zâ t’rrugës që gumzhin

I rashë cep më cep,

Ia preva rrugën e një andrre që endet si dikur

Ia piva limonadën me dredhëza

Ia shkela kalldrëmin me farë kungulli

E u ndala aty-këtu,

Si me lanë shenjë

U çel dita n’qytetin e hekurudhës

E u ba çicër panorama,

E në shpirtin tim më mbetet ajo pasqyrë

Me lypsa fëmijësh me gishta t’thatë

Tu hjek nën hijen e kullave

Binjake, trenjake, pesënjake

Kulla që mbajnë veç kate

Çicër u ba qyteti

E n’matanë rruge

Shitësit e frutave shplunë çarçafët e natës

Pa vesë, e në qetësi

A qyteti i hallakatur qysh mbramë

nga zhurma e natës mban qepallat randë

E megjithatë, unë prapëseprapë

I gëzohem si një fëmijë

Rrobeve të reja për ditë dasme

Gusht25

/QendraPress/