Çaste poetike me poeten;-Shpresa Fundo GJERGJI

Brenda librit

————————————-

Si libër pa fund shfletoj vetveten,

Një film i gjatë shpirti im i dlirë,

Akoma mbi supet e mia mbetem,

Jeta, pasioni, dhimbja aty shkrirë!

 Vështroj me sytë e mendjes e lexoj,

Eh, sa shumë mendimi më vlon,

Përpiqem të jem prozë e shfletoj,

Ndër brinjët diçka më sëmbon…

Ah ky “ah-u” që jetën ma merr,

E ma shtrin ndër faqet e librit tim,

Aty sikur ti të vije dhe njëherë,

Një urë do t’ngrihej si premtim!

Koha librin e jetës do ta zverdh,

Unë brenda me copëra aty ndërtuar,

Rrëfenjat e mia në hapat që hedh,

Mes prozës dhe jetës së jetuar!

Para meje ky film akoma shfaqet,

 E fletët e librit shkruhen pa droje,

E ledhatuar, e rrahur shpërfaqem,

 Si ujët e burimit ndër kroje….

/QendraPress/