Çaste poetike me poeten;-Teuta BIÇAKU

Tri fytyra

—————————

Më sheh hija nga brinjët e errësirës,

rrëshqet në sytë e mbyllur të heshtjes së gurit,

atij të palëvizurit në fund të ujit.

Një tjetër jam në rrugën pa emër,

dritë që thyhet në xhamin e furtunës,

këmba ime shkel mbi hije që gumëzhijnë

si insekte në asfaltin e nxehtë të udhës.

E treta, një frymë që s’njihet,

i ngjan një trupi që s’ka trup,

ëndrrës që kafshon skajet e qiellit

pa e gjetur kurrë tokën

ku të bjerë butë -butë.

Në cilin sy jam unë?

Në të hapurin, në atë mbyllur,

apo në syrin që nuk është sy,

por një rreth që shtrëngon heshtur?

/QendraPress/