Çaste poetike me poeten;-Vjollca ALIAJ

Kllounët e errësirës

—————————

Zvarriten nga shpellë e errët e mitologjisë

Kllounë shëtitës me flamuj erëmyk

Vras mendjen: si mëngjeset e përflakur

i bëjnë “synet” të bekuarat ditë…?!

Kjo qenkësh arsyeja e shirave të helmtë !!

Më duhen pëllëmbë gënjeshtre,

të mbuloj sytë, luluar nga kripa

Nuk kam stomak për trupa të

 gjymtuar fëmijësh nën predha

Pasqyrat përqeshin fytyrën time,

 allá Picasso

Qerpikët kullojnë në vend të lotëve verbëritë

Ushtri robotësh nën marshe funeralesh,

Kameramanët filmojnë “a zombie game”

Shekulli i fundit fsheh kokën, si struci

Kllounët klonojnë njëri tjetrin.

Ç’tmerr!

Kronikat thonë se kjo e gjitha është një thashetheme

Legjendë urbane, a ndoshta një trillim

Kllounë shëtitës, me flamuj erëmyk,

zvarriten nga shpellë e errët e mitologjisë.

/QendraPress/