Çaste poetike me poetin;-Gëzim AJGERAJ

SHI BIE MBI ALPE

———————————-

Mëngjesi i zymtë Alpin

i lëvarë reve

m’i vodhi gëzimet e ditës

dhe ëndrrat e trazuara

të mbyllura tek arka

e verës pandemike

Mbase duhet t’i bindem

kësaj dite të zymtë gushti

dhe dëshirave të prangosura

të verës sivjet

që nuk ia pamë syrin e shkëlqimit

atje mbi Sharr

Vetëm malli

i mbathi mbathcat e kthimit

e flatroi flladeve në Vërri

të çmallë kujtimet e lëna

ndër lisa

këtu e tri dekada e gjysmë

më herët

Retë e zymta

të këtij mëngjesi Alpin

nisën të pikojnë shiun

e kujtimet e përmallshme

përtej xhami

mallkojnë vitin e mbrapshtë

dhe epokën pandemike.

/www.QendraPress.com/