Çaste poetike me poetin:-Sabit RRUSTEMI

SEKUSH MA TREMBI SHIUN

——————————————

U dogja së prituri

nën këtë ombrellë kaltroshe

e as më flladiti jotja puhi

e as më lagu një re me shi

E as hoqa dorë nga imja dashuri

Sekush ma trembi shiun

dhe një dredhë përpushi

qerpikët pluhur m’i mbushi

Mbeta para porte

i vetëm krejt mbeta

as një pikë për be

as dhe ty të gjeta

Me cilën re iku shiu

cilën vetëtimë shalove ti

të të ndjek pas me bubullimë

Sekush ma trembi shiun

bimën e re ma la të etur

dhe buzët e mia të përndezura

/QendraPress/