Çaste poetike me poteen; Shqipe BYTYQI

HARAQI KOHËS

————————

(apo ujdi gjigantësh)

Zeusi u zgjua në fronin e t‘jatit

hangër të gjithë me radhë

të gjithë banorët e Olimpit

trazoi balten tonë

me shpirtëra perëndish idhnak

dhe u lind gjysmë-hyu

apo gjysmë-njeriu

quaje si te duash

një krijesë mes shkëlqimit

dhe hijes së ferrit

Koha ende han bijtë e saj

me gishtërinj të gjallë

që prekin çdo frymë

me rrotat e saj qe përvajshëm kujisin

kërkon haraqin pandalë

Hektorin e kësaj ore

me dronet moderne

me luftë sustash

mbi fusha minash

mbi tavolina pune

mbi tapet të kuq

Për të mbrojtur bedene

kërkohet zemër vegjëlie

Për të shemb ato

ujdi gjigantësh

marrëveshje e shkruar

me zjarr dhe gjak

Quo vadis e imja botë!

/QendraPress/