E diela e 9 poetëve elitar me;Sabit RRUSTEMI
NJË ILIR I MOÇËM I KOSOVËS SË RE
( Si urim imi i përhershëm për Ditëlindjen e Ibrahim Rugovës )
Në Vjeshtën e vitit njëmijëenëntëqindeshtatëdhjetetre
shekulli i shkuar
në bibliotekën e fshatit
përmes PREKJËS LIRIKE ia mësova emrin
I njomë fare isha
për t’ia shpurshur kuptimin e fjalëve
atij libri që s’më shqitej duarsh
derisa i lexova dhe rreshtin e mbramë
Pesë vite e sa më vonë
do ta shihja mbrëmjeve në Shetitoren e Prishtinës
paraditeve në kafe ELIDA te Pallati i rinisë
Herë vetë i treti herë vetë i pesti
tjerrte kohën nëpër fjolla tymi
e ecte drejtë një dhome
ku e vazhdonte ndejën me miqtë e tij pa fjalë
që e prisnin si qentë besnikë të Sharrit vitrinave
Në fillim të tetëdhjetave
për herë të parë na u pikëpjekën shikimet duart e fjalët
në Pallatin e Shtypit aty në zemër të Prishtinës
Nga ajo ditë e këndej përditë jam përpjekur
për ta zbërthyer Morfologjinë e Heshtjes
që era e stinëve e memoronte mes rreshtash
po ngela në provim
Ish kohë maskash hijenash e krimbash
që na gërryenin deri në rrënjë
e ne duronim duronim më shumë se gjarpri nën guri
a nën dheun ilir
Filozofinë e këtij durimi u përpoqa ta zbërthej
përmes FJALËS
kur unë flladitesha verës plot vapë në Burgun e Prishtinës
derisa ai me një makinë shkrimi OLIMPIA
ma nxirrte për lendine nëntekstin e LIBRIT
që ende s’e shkrova
Pastaj ra heshtja e ngecja e etja
jetërave tona e ëndrrave nëpër mjegulla
netëditëve të mbështjellura me ëndrra e zhgjëndrra
sa na tepruan e nuk i hargjuan as qentë
as pinikët e minukët rrugëve të Prishtinës e Kosovës
deri në ditën e sotit
Ai i la miqtë e heshtur brenda kopertinave
doli prej dhome me flokët e zgjatura
e të dredhura prej vuajtjeve
me shallin e mbështjellur rreth qafe
në një rrugëtim me plot të panjohura
e me një mal ëndrrash për liri pavarësi e demokraci
Iu vura pas
hap pas hapi
po nuk nxinej dot hapi i Tij
Ai ecte
tej kohës që e jetonim
sa një Botë e tërë ra në hall
derisa na nxori në Dritën e Lirisë
Me llojë lloj emrash e thirrëm
me llojë lloj rrobash e mveshëm
e kurrë s’arritëm ta zdeshim
hamendjeve tona të sëmura
a ëndrrave të dëshirta
Erdhi mbolli e mbeti
në këtë Dardani të lashtë
me emrin që e pagëzoi jona Shtëpi
si një ilir i Moçëm i Kosovës së Re
që Fjalën s’mund t’ia luaj kush prej vendi
për jetë të jetëve
….
( 2 dhjetor 2018 – 2 dhjetor 2022 )
