E diela poetike me poeten;-Laureta MALAJ

MALL KURBETI !

———————–

Jam tek ty, vendi im ,

edhe pse larg jam tretur.

Në çdo frymarrje të ndjej ,

në çdo damar ke mbetur .

Anës detit rri e pres ,

me zemrën plot me mall .

Një fjalë e ngrohtë të vij tek unë

si diell në këtë valë.

Shqipja ime, fjalë e shenjtë,

më mbush shpirtin plot ngrohtësi .

Edhe kur largësitë na ndajnë ,

ti je strehë në vetmi .

Kurbeti i largët zemrën rëndon ,

si dallgë që shpirtin përplas .

Po zeri yt ,o atdhe i dashur ,

është dritë në këtë terr të pamasë.

Më ngroh era që vjen prej teje ,

më sjell fjalët e tua me mall .

Aromën e dheut tënd të shenjtë ,

dhe këngët e valëve në zall.

Larg jemi ,por shpirti s’ndalet ,

nën qiellin tënd ende unë jam .

Aty ku nëna ne na lindi ,

aty ku janë të dashurit tanë .

Do vij një ditë ,o vend i dashur ,

me lot gëzimi do jem aty .

Të puth tokën që më lindi ,

të shtrenjtës nënë t’i puth dy sy .

/www.QendraPress.com/