Fryma poetike e së dielës me poeten:-Alma BAJA

MISIONI I FJALËS!

————————

Plagë e stolisur me logjikë

dëshpërim i racionalizuar,

qorrsokak filozofik

një burg i sofistikuar…

Zë i thellë, por jo i lirë

fjalë “të mençura” mbi boshësi,

errësirë e veshur me gjenialitet

gjuhë e ngritur – pa thelb, pa dritësi…

Dhimbja bërë flamur

e shoh t’vishet si doktrinë,

shitet trauma si profeci

jo si plagë që kërkon shërim…

Vërtet’ dhimbja është për t’u ndarë

veç jo për t’u ngritur n’sistem besimi,

jo çdo plagë është udhë

nëse s’është marrë mësimi…

Shitet errësira si ndriçim

por njeriu nuk mbaron në errësirë,

e vërteta u mbijeton plagëve

ajo gjithnjë, na bën të lirë…

***

Arti sublimim që tejkalon egon

që të tjerët – të mos i lëndojë,

ai s’është një zbrazje bosh

dritën duhet të pasqyrojë…

Një shpirt i vuajtur duhet t’ndërtojë ura

dhe jo të flasë – ai nga humnera,

s’dua fjalë që zbukurojnë burgun

por fjalë që çelin horizonte t’reja…

/QendraPress/