Fryma poetike e së dielës me poeten;-Farie BISHA

Në fijet e fatit…

—————————–

Penelopa endte ditën

si merimanga rrjetën e mëndafshtë.

Natën shthurte pëlhurën

ndër vite të tretura mes fijesh trishtimi.

Odiseu lundroi disa dete larg,

por i mbështjellë nën hije mendimesh,

me Itakën lidhur mbeti.

Në rrjetën e fantazisë së saj,

Cirçja peng i vetes ngeli,

në ishullin e largët.

Sirenat prisnin gjahun,

me zërat e tyre edhe të vdekurit mahnitnin

Mjerë kush i dëgjoi

e humbi udhën e kthimit në tinguj mishngrënës.

Në gjithë marramendjen:

tërheqje, dëshira, zhgënjime,

kërkime e humbje,

kush fijet i lidhi dhe veten gjeti?

Fati në drejtime të kundërta kaloi,

në paralele e kryqëzime, perëndish armike.

Më shumë vuajti ai që e ndoqi

dhe u tret si akulli i korrikut

në pritjen e tij, i ngrati.

Dikush mori atë që mundi,

tjetri, në heshtje, ashtu iku…

I ngatërruar mes fijesh të veta,

ndoshta fati ka një plan…

ndoshta edhe lundrojmë në bordin e tij

me busull shpirti…

Farie Bisha Luzern 29.3.2025

/QendraPress/