Fryma poetike e së dielës me poetin:-Ramë ORACA

MUNGESA E LIRISË

(Ylfete Humollit)

———————————-

nga etja e madhe

liria nuk lëshonte rrënjë

dhe secila stinë bëhej më e acartë

në zemrën e saj të njom

ajo me krahë engjëjsh

fluturonte pas fluturave të bardha

derisa në grykë të Kulinës

një kafshë e zezë ia këputi krahët

shkurti i njëmijë e nëntëqind e nëntëdhjetës

zgjati vetëm një ditë

po atë ditë

Llapi doli nga shtrati

në kërkim të pranverës

atë ditë dielli perëndoi më herët

po atë ditë një rreze u shua në sytë e Ylfetes

dhe një yll u ngrit në qiell

ai përjetësisht dritëson

kah agu i lirisë.

/QendraPress/