Fryma poetike e së dielës me poetin;-Sabit RRUSTEMI

HYR SA MË PARË

(Varianti final)

————————–

Zemra ime pa frymë pret

syhapur kah dritarja

e veshtë kah porta

Nisu më

se nuk ka festë pa Ty

Vera braktisi gotën

u kthye aty ku ishte më parë

si protestë e vonesës sate

Ti e di që unë

me hapin Tënd ditën e mati

e hapësirën e syve të mi

e kthjellon vetëm jotja prani

Në cilën pore të reliefit ngece

në ç’brenga zure në thua

ato dritëza kah tretën

Një krue e shterra në pritje

dhe etjen ende s’e shuajta

Dymbëdhjeta e natës

m’i shpon veshët përmes orës

sekondat e fundit të ardhjes ikën

E dashur vetëm hyr

hyr sa më parë

se ndjenjat e mia

mendsh po më luajnë

(1 janar 2015 – 1 janar 2018 – 1 janar 2026)

/QendraPress/